- වර්ෂ 1880 ජූනි 25 වන දින අම්බලන්ගොඩ උපත ලබමින් 1955 නොවැම්බර් 21 දින අප අතරින් සමුගත් එම්. සාර්ලිස් (මාලිගාවගේ සාර්ලිස්) බෞද්ධ චිත්‍ර කලාවේ නව පුනරුදයක් ඇති කළ ශිල්පියෙකි.
- ටවර් නෘත්‍ය ශාලාවේ චිත්‍ර වස්ත්‍ර සකස් කළ රිචඩ් හෙන්රිකස්ගේ බටහිර චිත්‍ර කලා ශෛලීය ලක්ෂණ එම්. සාර්ලිස්ගේ බෞද්ධ චිත්‍ර නිර්මාණ සඳහා ආභාසය විය.
- එම්. සාර්ලිස් ශිල්පියාගේ බෞද්ධ සිතුවම් නිර්මාණ, විහාර සිතුවම් හා ලිතෝ මුද්‍රිත සිතුවම් ලෙස කොටස් දෙකකට බෙදා වෙන් කළ හැකි ය.
- යටත් විජිත කරණය තුළ ශ්‍රී ලංකාවේ ජනප්‍රිය වී තිබූ බ්‍රිතාන්‍ය රැජිනගේ රූප වෙනුවට බෞද්ධ චිත්‍ර, සිංහල බෞද්ධ ජනතාව අතර ජනප්‍රිය කිරීමට පුරෝගාමී වූයේ එම්. සාර්ලිස් ශිල්පියා ය.
- ඔහු විසින් අඳින ලද බෞද්ධ සිතුවම් 1923 දී ජර්මනියට යවා ලිතෝ මුද්‍රිත ක්‍රමයෙන් පිටපත් ලබා ගැනිණ.
- එවැනි සිතුවම් 36 ක් විය. පහත සඳහන් වන්නේ ඉන් කිහිපයකි.
- සිද්ධාර්ථ කුමාරෝත්පත්තිය
- පියුම් පිට වැඩීම
- ශිල්ප දැක්වීම
- සිදුහත් යශෝධරා සරණ මංගල්‍යය
- සිදුහත් කුමරු හා මව් බිසව
- දුෂ්කර ක්‍රියාව
- සීවලී මහ රහතන් වහන්සේ
- එම්. සාර්ලිස් ශිල්පියා විසින් සිතුවම් ඇඳ ඇති බෞද්ධ විහාරස්ථාන කිහිපයක් පහත සඳහන් වේ.
- කොළඹ මාලිගාකන්ද විහාරය
- ඉඳුරුවේ යාලගම විහාරය
- මතුගම පාන්තිය ශ්‍රී මංගල විහාරය
- පොතුපිටියේ පුජාරාමය
- එම්. සාර්ලිස් ශිල්පියාගේ සිතුවම්වල දැකිය හැකි කලා ලක්ෂණ:
- මනා සම්පිණ්ඩනය
- පර්යාලෝක ලක්ෂණ දැක්වීම
- එළිය අඳුර හා ත්‍රිමාන ලක්ෂණ දැක්වීම
- දීප්තිමත් වර්ණ භාවිතය
- විචිත්‍ර සැරසිලි කරණය
- බටහිර ස්වභාවික ශෛලියේ ආභාසය
- එම්. සාර්ලිස් ශිල්පියාගේ සිතුවම් කිහිපයක් පිළිබඳ විමසා බලමු.
සිදුහත් කුමරු හා මව් බිසව (ලිතෝ මුද්‍රිත)
- අපරදිග / බටහිර ස්වභාවිකවාදී චිත්‍ර ශෛලියේ ආභාසය අනුව රූප රචනය කර ඇත.
- පුනරුද යුගයේ චිත්‍ර ශිල්පීන් අඳින ලද මරියතුමිය හා ජේසු බිළිඳා දැක්වෙන මැඩෝනා චිත්‍ර වල ආභාසය දැක ගත හැකි ය.
- සිතුවමේ මානව රූප සඳහා විචිත්‍ර ලෙස යොදා ඇති වස්ත්‍රාභරණ පෙරදිග ශෛලියේ ආභාසය පෙන්නුම් කරයි.
- විශේෂයෙන් ඉන්දියානු සම්ප්‍රදායේ ඇඳුම් පැලඳුම්වල ලක්ෂණ කැපී පෙනේ.
- රූප වල ත්‍රිමාන ලක්ෂණ ඉතා හොඳින් මතු කර ඇති අතර විචිත්‍ර වර්ණ මාලාවක් ද වේ.
- සිදුහත් කුමරු හා මව් බිසව දක්වා ඇත්තේ මාළිගා අභ්‍යන්තර සමීප රූප දර්ශනයක් ලෙස ය.
- සමස්ත සිතුවමේ පෙරබිම සහ පසුබිම පමණක් දක්වා ඇත.
- මාළිගා කවුළුවෙන් පෙනෙන පසුබිම පර්යාලෝක ලක්ෂණ සහිත භුමි දර්ශනයක් ලෙස දක්වා ඇත.
පියුම් පිට වැඩීම
(ලිතෝ මුද්‍රිත)
- චිත්‍ර අවකාශයේ ගැඹුර මතු වන සේ පර්යාලෝක ලක්ෂණ පෙන්වමින් ස්වභාවිකවාදී ශෛලියකින් රූප සංරචනය කිරීම දක්නට ලැබේ.
- පෙරබිම, මැදබිම සහ පසුබිම යන තල මත පර්යාලෝක ලක්ෂණයට අනුගත වෙමින් රූප හා සිද්ධි ගණනාවක් සිතුවම් කර ඇත.
- සිතුවමේ පසුබිම අවකාශ පර්යාලෝක ලක්ෂණ සහිතව භුමි දර්ශනයකින් සමන්විත ය.
- ත්‍රිමාන ලක්ෂණ මතුවන සේ විචිත්‍ර වර්ණ මාලාවක් භාවිත කර ඇත.
